Obra épica de colonización humana

Socalcos, sucalcos, muras, paredes, muros, paredós, calzadas, son todos eles nomes que reciben as terrazas de cultivo, un trazo característico e singular da Ribeira Sacra e, sobre todo, un enxeño da alta eficiencia hídrica e edáfica.

Os socalcos, o espectacular abancalamento do cultivo agrícola en pendentes extremadamente abruptas, son unha obra épica de colonización humana.

Esta é unha terra que desde a Idade Media se especializa en viticultura, sen obviar a importancia doutros cultivos como a castaña ou a cereixa. A natureza singular, a pegada monástica e as comunidades campesiñas construíron esta paisaxe, viva e funcional ata o presente.