A pegada eremítica e monástica

A relación harmónica entre a auga e a terra, entre o espazo cultivado e o espazo construído é unha herdanza das comunidades relixiosas. A pegada do papel dos mosteiros na xénese da cultura hidráulica do territorio relaciónase cos aforamentos de terras e muíños de auga a través da historia.

Os eremitorios e o bosque de igrexas e mosteiros ilustran unha etapa esencial do proceso evolutivo da paisaxe cultural da auga. Algunhas igrexas afastáronse da orientación canónica leste-oeste, para situarse como balcóns sobre os ríos, a medio camiño entre a auga e o ceo.